14/1/2009(02:00A.M.) 香港-->仙台
今次難得同媽咪&細佬三人行到日本旅行, 計劃了大約三、四個星期(其實幾求其咁講下想去邊, 諗住去到先plan
, 咁大概去邊都知嘅) 無拘無束咁就起行, 開始咗呢八日任食任玩自由行之旅! Let's go ! go ! go !
點解呢張相嘅背景咁黑? 皆因懂得善用時間嘅我地今次選擇乘搭半夜機, 直飛日本羽田機場, 隨即轉車到仙台.
呢個消夜成三點幾先有得食, 好多人已經熄燈瞓咗, 而且味道一般
到啦! 因為剛剛天光, 你睇出面幾靚.....
阿媽食唔飽, 一落機就要食嘢, 去咗身後呢間麵包店買咗一個好貴, 但好普通嘅包, 要成￥189 (HK$16).
由羽田機場到仙台, 要先去品川站轉車, 由於我們有JR East Pass, 所以訂了 東北新幹線由東京à仙台嘅車票 (單程要￥5780).
車上買壽司做小吃￥500.
11:00A.M.終於到達了仙台, 站內好多counter賣手信, 當阿媽周圍試食嘅時侯,
我去咗影底D時刻表、地圖及路線圖之類嘅嘢, 可以隨時playback, 好方便!
離開車站, 雖然酒店未夠鐘check in, 都決定先放底行李, 足足找了20分鐘, (天氣凍,行李又重) 先找到我們的東橫INN, 唔好信網址話5分鐘!
我們三人各放低幾兩後, 已一點鐘, 好肚餓, 又要揾啲嘢食先, 仙台出名牛舌, 四周食肆都排長龍, 等咗15分鐘, 結果去咗旅遊書介紹嘅呢間伊達食炭燒牛舌定食, 三份定食合共￥4830(HK$396)覺得唔抵食, 因為份量少, 味道又…….總之冇我預計咁好食啦!
食完飯已接近兩點幾鐘, 先到仙台市內逛逛, 去到火車站的另一邊, 就見到呢班人唔知係到做咩, 佢地真係好勇,全部赤膊上陣 
(枉我着住件羽絨), 佢地個口仲含住張白紙係到遊街.....原來呢啲叫松焚祭 : 在每年的1月14日，舉行一年一度的“松焚祭”，燒納元旦裝飾用的門松等，以祈求一年的無病消災。
冇理咁多, 我們決定坐呢款循環巴士四圍遊覽, 每人￥600無限上落(單次都要￥250)
旅遊車一路行, 巳見四周有一層薄雪.......
第一站 : 宮城縣戰國神社
企係呢個位冇乜嘢睇, 仲凍到抽筋, 好想快啲走人, 但由於下班車要20分鐘先有, 唯有影下相, 食下西北風先........
但最慘係影影下過咗時間, 又等多20分鐘..... 
青葉城址內的仙台藩藩祖伊達政宗騎馬像
下一站 : 宮城縣美術館(門外)
只是匆匆影了幾張相...........
冇入去睇, 因就閂門, 而且要趕回程了! 無錯, 係回程! 因Loople Bus尾班車是至16:30, 記住下次來要預全日時間坐車才可行完12個景點, 切勿浪費! 呢啲就係冇plan行程既後果!
切勿模仿!
回到市中心, 又見到另外一班人........好勇!
冇佢地咁好氣, 又凍又餓好可憐, 買條日本蕃薯食下先￥200
食玩蕃薯剛好入黑, 周圍行下睇下晚餐食乜先.........
行咗一陣百貨公司, 買咗呢啲雜食返酒店開餐, 點知佢兩個太攰, 冇食嘢就扒咗係床瞓咗, 只得我一個人飲, 一個人食, 一個人睇電視, 一個人plan 明天的行程.......
待續.....
參考網址:
仙台市簡介 http://www.city.sendai.jp/kikaku/kokusai/chinese_t/kankou.html
仙台旅遊資料 http://www.sentabi.jp/tw/
Sendai Guidebook (Eng.) http://www.sentabi.jp/#1
Loople循環巴士 http://www.kotsu.city.sendai.jp/bus/loople/index.html
留言列表
